خه ییامی هه ژارانه

بێهووده‌یه‌ بیر و خه‌م، دڵت خۆش که‌ برا
پرسیار نه‌کرا، به‌شت درا هه‌رچی درا
تۆ هێشته‌ نه‌هاتوویه‌ جیهان ڕۆژی به‌رێ

ئه‌و ڕۆژه‌ ده‌بوو بچیته‌ ده‌ر، دیاری کرا

به‌س هه‌ڵ بخولێ به‌ ده‌وری پیس و پاکا
تا که‌نگێ به‌ شوین هه‌موو خراپ و چاکا
گه‌ر زه‌مزه‌می، یان دای بنێ ئاوی ژیانی
ناچاری ده‌بێ ڕۆچی به‌ سینه‌ی خاکا

ئه‌و ڕۆژه‌ خودا سانی گیانی ڕانا
ده‌یزانی به‌ کرده‌وه‌م، خودایه‌ و زانا
هه‌ر خۆیه‌تی دایناوه‌ هه‌ڵه‌ و سه‌رپێچم
سووتانی جه‌هه‌نده‌می له‌به‌رچی دانا!؟

گێژی له‌ خه‌یاڵات و گله‌ی به‌ختی ڕه‌شت
ڕابوێره‌ هه‌تا به‌ جارێ نه‌بڕاوه‌ به‌شت
ده‌س بگره‌ به‌ به‌ندی سه‌ر و پرچی جوانێک
تا هه‌ڵنه‌وشێنراوه‌ هه‌موو به‌ندی له‌شت

بۆ گۆزه‌ کڕین ده‌چوومه‌ لای گۆزه‌ که‌رێک
سه‌د گۆزه‌ به‌من پێکه‌نی! هه‌ر یه‌ک له‌ به‌رێک
ئێمه‌ی وه‌کی خۆت ده‌به‌ی! سبه‌ینێ خۆشت
وه‌ک ئێمه‌ ده‌بی به‌ گۆزه ‌، لای بێخه‌به‌رێک

ڕابوێره‌ به‌ سه‌ربه‌رزی به‌ نان و ئاوێک
سه‌ر دامه‌نه‌وێنه‌ بۆ هه‌موو ناپیاوێک
له‌م ژینه‌ که‌ هه‌ر ده‌مێکه‌ دێت و ده‌ڕوا
مه‌ردایه‌تی مه‌فرۆشه‌ له‌ پێناو تاوێک

گۆزێک له‌ ده‌سم شکابوو ، ئه‌و گریا بۆم
خه‌م دات نه‌گرێ منیش یه‌کێکی وه‌ک تۆم
زۆر جار منیش وه‌کو تۆ گۆزه‌م ده‌شکاند
تۆش ڕۆژێ ده‌بی به‌ گۆزه‌ ده‌شکێی وه‌ک خۆم

ده‌م بینی که‌ خه‌مبار و کز و داماوم
وا بیر مه‌که‌وه‌ له‌ مه‌رگ و که‌س ترساوم
مردن که‌ له‌ ڕێمه‌ ، هه‌ر ده‌بێ ، ناترسم
ژاکاوی ئه‌وه‌م به‌ ئاره‌زوو نه‌ژیاوم

هات و چوو به‌ بێهووده‌ مناڵی و جوانیم
پیر بووم و به‌ بێ داخه‌که‌م و خۆزیا نیم
شاگردی زه‌مانه‌ بووم و زۆریش چه‌وسام
وه‌ستام له‌ هه‌موو کار و له‌ هیچ وه‌ستا نیم

وه‌ بزانه‌ جیهان به‌ ئاره‌زووی تۆ ده‌گه‌ڕێ
ئه‌م چه‌رخ و خوله‌ی هه‌مووی به‌ فووی تۆ ده‌گه‌ڕێ
وه‌بزانه‌ که‌ سه‌د ساڵێ ژیاوی ، پاشان چی؟
مه‌رگێکه‌ له‌ سه‌ر ڕێگه‌ له‌ دووی تۆ ده‌گه‌ڕێ

جوانی به‌ په‌له‌ و به‌بێ نه‌وه‌ستان ڕۆیی
ڕۆژگاری ژیان وه‌ک شه‌وی مه‌ستان ڕۆیی
ئه‌م ژینه‌ که‌ هه‌ر ده‌مێکی دنیای دێنا
داخم که‌ به‌بێهووده‌ له‌ ده‌ستمان ڕۆیی

تا باخی گوڵی به‌خت و جوانیت له‌به‌ره
‌ سه‌رخۆش به ‌، دڵت خۆش که ‌، چ وه‌ختی که‌سه‌ره‌ ؟
ئه‌و ڕۆژێ له‌ ده‌س ده‌چێ وه‌گیر نایه‌ته‌وه‌
چه‌پ گه‌ردی زه‌مانه‌ دوژمنی قه‌سته‌سه‌ره